1934

Al nas a Napoli (tal borc Sanità). La infanzie e je dificile, la adolessence impegnative.

Imparant bessôl, si dediche al dissen e ae piture.

1962

Si maride cun Angela Salomone, inseparabile tant che femine e colaboradore fondamentâl. Dopo un an e nas la prime fie, Barbara.

1964

I regalin un ingrandidôr fotografic di seconde man. Al tache a sperimentâ lis tantis pussibilitâts espressivis dal mieç fotografic.

1967

Al nas il secont fi, Francesco. Al partecipe pe prime volte a un concors nazionâl vincint il prin premi: une Nikon F. Al lasse il lavôr par dâsi ae fotografie; al organize la sô prime mostre personâl te librarie "La Mandragola" di Napoli. La riviste americane Popular Photography e publiche une sô opare. Al cognòs Allen Ginsberg, Domenico Rea e Fernanda Pivano.

1968

Tal Teatro Spento dal Palaç Ducâl di Urbin al fâs la sô prime mostre personâl intun spazi public. Al è tra i protagoniscj de sene culturâl e artistiche napoletane.

Al tache une lungje colaborazion cul galerist Lucio Amelio te sô Modern Art Gallery. Al è in contat ancje cul studi Trisorio, cu la Galleria Lia Rumma e cul studi Morra. Al cognòs i esponents principâi de avanvuardie: Andy Warhol, Joseph Beuys, Robert Rauschenberg, Gino De Dominicis, Giulio Paolini, Joseph Kosuth, Sol Lewitt, Jannis Kounnellis, Hermann Nitsch.

1970

Al insegne te Academie des Bielis Arts di Napoli. La sô e je la prime catidre di Fotografie ative in Italie. Un an dopo al nas il tierç fi, Sebastiano.

1973

Tal SICOF di Milan al presente Il ventre del colera, un lavôr su la epidemie che si jere difondude a Napoli. Il test dal catalic al è di Domenico De Masi.

1974

Al fâs un viaç in Gjapon.

Cun Roberto De Simone al publiche Chi è devoto, une indagjin acurade su lis devozions e i rituâi popolârs de Campanie cu la prefazion di Carlo Levi.

1980

Al publiche Vedute di Napoli, un pont di svolte de sô poetiche. Al cognòs Luigi Ghirri.

1983

L'editôr Fabbri i dediche un dai prins volums monografics de golaine “I grandi fotografi”.

Cun Luigi Gherri al publiche il libri Capri par cure di Cesare De Seta.

1984

Al partecipe al progjet "Viaggio in Italia" cun Luigi Ghirri, Gabriele Basilico, Giovanni Chiaramonte, Guido Guidi, Olivo Barbieri, Mario Cresci, Vincenzo Castella e altris.

1988

Al fâs un lavôr su la citât di Arles che al presente tal museu Réattu di Arles. Al espon te Maison Européenne de la Photographie.

1992-1994

Al fotografe Parîs. Al publiche il volum Antonio Canova.

1995

Al finìs la ricercje sul mît dal Mediteriani intune mostre tal Philadelphia Museum of Art tal libri Mediterranean publicât di Aperture, New York.

Al fâs Eden.

1999

Al fotografe Rome (al tornarà a fotografâle tra il 2005 e il 2007).

Tal Museu Archeologjic di Napoli al presente la mostre “Mediterraneo”.

2001

Tal Massachussets College of Art and Design di Boston al espon “Inlands. Vision of Boston”. Il sindic de citât lu premie cul Certificate of Recognition.

La Galarie di Art Moderne di Turin i dediche une grande retrospetive.

2003

Il so non al ven zontât inte Enciclopedia Treccani. La Accademia dei Lincei i da il premi “Antonio Feltrinelli”, assegnât pe prime volte ae Fotografie.

Roberta Valtorta e cure une sô monografie intitulade Mimmo Jodice.

2004

Al espon tal MART di Trent e Rovereto. Al fâs un lavôr su São Paulo, esponût tal MASP.

2006

Lis sôs fotografiis su Mosche a son esponudis inte Maison Centrale de l’Artiste a Mosche.
La Universitât Federico II di Napoli i consegne la lauree honoris causa in Architeture.

2007

La Fondazione Forma per la Fotografia di Milan i dediche une grande retrospetive intitulade

Perdersi a guardare. Trent’anni di fotografie in Italia.

2010

Il Palaç des Esposizions di Rome i dediche une retrospetive curade di Ida Gianelli e Daniela Lancioni. Dopo, la mostre e je presentade ancje te Maison Européenne de la Photographie di Parîs.

2011

Il Louvre di Parîs lu invide par realizâ un lavôr site-specific sul museu che al siere “Le Yeux du Louvre”.
Il Ministeri de Culture francês lu nomine Cavalîr dal Ordin des Arts e des Letaris.

2012

Sîs universitâts europeanis di architeture a domandin ai lôr students di progjetâ l'archivi e la fondazion Mimmo Jodice tal centri storic di Napoli.

I Museus Vaticans i domandin di realizâ un progjet fotografic su lis colezions dal museu. I siei lavôrs a saran publicâts tal libri In piena luce. Nove fotografi interpretano i Musei Vaticani adun cun chei di Massimo Siragusa, Antonio Biasucci, Rinko Kawauchi, Francesco Jodice, Martin Parr, Alain Fleischer, Bill Armstrong e Peter Bialobrzeski.

2013

La Universitât di Architeture di Mendrisio e dopo, tal 2016, la Academie des Bielis Arts di Macerata, i consegnin la lauree honoris causa.

2016

Il Museu Madre di Napoli i dediche une grande retrospetive: Mimmo Jodice. Attesa (dal 1960).

Dal 2018 al 2024

Lis oparis di Mimmo Jodice a son esponudis tal Multimedia Art Museum di Mosche, tal Museu Eretz di Tel Aviv, tal Jeu de Paume di Parîs, te Trienâl di Milan, te Galerie Karsten Greve di Parîs e di Saint Moritz, tal MAC di Gibellina, tes Gallerie d’Italia di Turin, tal MAXXI di Rome, te Vile Bardini a Florence e te Camera di Turin.

Vuê Jodice al è un artist di riferiment fondamentâl pes gnovis gjenerazions che a ricognossin intal so lavôr une sensibilitât e capacitât uniche intal meti adun inovazion e finece classiche.