Dino e Mirko Basaldella

Dino (Udin, 1909 -1977) al è il plui vecjo dai fradis Basaldella e ancje chel che al restarà plui leât a Udin, la sô citât di origjin. Al frecuente il Liceu Artistic a Vignesie, dulà che si aferme tant che scultôr. Di li, si trasferìs prime a Florence e dopo a Rome, dulà che al madure une prime fase definide "neoelenistiche", influençade de sculture classiche. A tacâ de fin dai agns Cincuante al disvilupe un interès particolâr pai materiâi di scart industriâi e pes lôr potenzialitâts: fier, metal e saldaduris a viste a deventin protagoniscj in oparis tant che Spartaco, Orecchio di Dionisio e Ferro, presentadis in cheste sale. Ancje El Partidor, restaurade tal 2024 e esponude te jentrade dal plan tiere, e je un esempli evident di chest interès dal artist pandût in clâf monumentâl. Influencis diferentis si cjatin invezit in so fradi Mirko (Udin, 1910 - Cambridge, Massachusetts, 1969) che - rispiet a Dino - al à viazât a lunc cjapant sù svariadis influencis culturâls che lu àn puartât a un primitivisim artistic che o podìn preseâ tes dôs Chimere e tal Motivo a rocchi esponûts achì.

Afro e Mirko Basaldella

Nassût a Udin tal 1912, Afro Libio al frecuente il Liceu Artistic a Vignesie come i siei fradis Dino e Mirko e al scomence cun lôr tal 1928 te "Scuele furlane di Avanvuardie". Tal 1930 al rive a Rome, dulà che si svicine ae Scuele romane, par rivâ dopo a Milan tal studi di Arturo Martini adun cun so fradi Mirko. Ducj i doi a saran influençâts di Martini tes sieltis tematichis, te impostazion anticlassiche e tai rivocs impressioniscj. Plui indenant, i doi fradis a cjaparan stradis diferentis, ognidun lant daûr de sô interpretazion artistiche. Dopo svariadis sperimentazions, Afro si dediche ae art informâl, tocjant il so massim tal espressionisim astrat american, svilupât in gracie dai siei viaçs tai Stâts Unîts e evident in Angelica (1964), opare li che la riduzion de palete di colôrs e je fuarte. Mirko, dopo di une fase dedicade ae scomposizion post cubiste, al sperimente la astrazion midiant dai "motîfs a strece" che o cjatìn sedi tes temparis e tai dissens a cere che a son esponûts achì - donâts al museu dai siei fradis tal 1974 par volontât de mari - sedi tal studi dal Cancello delle Fosse Ardeatine (1950).