Augusto Agricola (Udin, 1819 - 1857)
Loze di Sant Zuan (Udin)
Stampe fotografiche ai sâi di arint di negatîf
1856
Museu dal Risorziment, inv. 52748/R

La opare e je stade donade dal miedi e colezionist furlan Giuliano Mauroner (1846 - 1919) tal 1910 ae Societât furlane dai tornâts e veterans des bataiis de patrie, par insiorâ l’implant espositîf dal Museu dal Risorziment, che di cualchi an al jere ospitât tal Cjistiel di Udin. Cuant che al murì tal 1919, Mauroner al lassà ai museus di Udin la sô preziose racuelte di oparis di art, zoiis e furniments par compensâ la citât dai dams patîts dopo de Rote di Cjaurêt (ai 24 di Otubar dal 1917).
La fotografie di Agricola e jere stade fate par ricuardâ la Esposizion Furlane di Bielis Arts e Mistîrs organizade a Udin tal 1856.
Sot de dominazion austriache, finide dîs agns dopo, la Loze di Sant Zuan, che e domine in chê che vuê e je Place Libertât (in chê volte clamade Place Contarene e dopo intitulade al re di Italie Vitori Emanuêl II), e jere sierade di un ristiel di fier, parcè che e dave acet a un puest di vuardie e a archivis asburgjics.

Giovanni Bozza, dissegnadôr
Fin de monarchie asburgjiche
Litografie su cjarte no stricade cun scritis a man e ritocjadis a chine e lapis
ai 22 di Març dal 1848
Museu dal Risorziment, inv. 50921/R
1908, donazion Gabriele Fantoni (Vicence, 1833 - Vignesie, 1913)

Cheste litografie, che purtrop e je framentarie, e presente anotazions descritivis e e je rifinide a chine e lapis. La opare si fonde suntune composizion ideade dal pitôr Giovanni Bozza a Vignesie ai 22 di Març dal 1848, zornade de proclamazion de Republiche di Sant Marc cun a cjâf Daniele Manin.
La sene complete si le cognòs midiant di altris – rârs – esemplârs. L’imperadôr Ferdinant I di Austrie al sta par jessi sfracaiât di un baldachin, leât a une cuarde, che il braç di Piu IX al è li li par taiâ, assaltade dal leon (Vignesie) e dal sarpint (Lombardie). Chescj elements a rifletin l’otimisim che al animave la Italie, e in particolâr Vignesie, fin ai 29 di Avrîl dal 1848, cuant che Piu IX al gjavà la poie al intervent des trupis pontificiis cuintri dai Asburcs tal Lombart Venit.
In ete napoleoniche, i francês a vevin za doprât il leon di Sant Marc e il sarpint dai Visconti intai simbui dal efimar Ream Italic (1805 - 1814) che al ocupave la plui part dal Centri e dal Nord de penisule. Dal 1815, i Asburcs a dominavin il Ream Lombart Venit, che al jere il lôr teritori plui siôr: cu lis sôs tassis, il guvier di Viene al mantignive il costôs sisteme militâr e burocratic, fondamentâl par controlâ la Mitteleurope e l’Alt Adriatic.
Propit tal 1848, i “350 Itali” assediâts des fuarcis asburgjichis tal fuart di Osôf a tornarin a imparonâsi de italianitât di chescj doi simbui eraldics metintju dentri tal innomenât Vessillo di Leonardo Andervolti conservât intes racueltis dal museu.

Anonim
Plebissît Roman
Oleografie
dopo dai 20 di Setembar dal 1870
Museu dal Risorziment, inv. 50920/R

Tal 1907 Guglielmo Heimann, president de Societât furlane dai tornâts e veterans des bataiis de patrie, al donà ae associazion cheste cromolitografie fissade su tele par insiorâ il museu dal Risorziment di Udin, a pene nassût.
Vuê, di cheste composizion une vore rare, si cognòs dome un altri esemplâr, di dimensions compagnis, conservât tal Museu Civic dal Risorziment di Bologne.

Luigi Bassi (1833 - 1871), dissegnadôr e incisôr
Angelico Bolcioni, editôr e tipograf, Verone
Sacris Monuments ae Memorie dai Martars de Libertât Taliane
Oleografie
dopo dai 20 di Setembar dal 1870
Museu dal Risorziment, inv. 54312/R

La composizion e je cognossude midiant di raris litografiis no coloradis. Si viodin i toponims des bataiis risorzimentâls plui impuartantis e dai ativiscj de ‘Rivoluzion taliane’ muarts par sfrancjâ il paîs de dominazion foreste, unîlu e fâlu deventâ democratic. Il riferiment ae “Breccia di Porta Pia” (ai 20 di Setembar dal 1870) al rapresente un terminus post quem pe sô realizazion.
Fin cumò, la sô trasposizion in oleografie e je stade cjatade dome in chest esemplâr, donât tal 1906 dal udinês Libero Grassi ae Societât furlane dai tornâts e veterans des bataiis de patrie par insiorâ il museu dal Risorziment di Udin, a pene nassût.

Nicolas Eustache Maurin (Perpignan 1799 - Parîs 1850), dissegnadôr e litograf
Lemercier, Bénard et Compagnie, tipografie e litografie
François Delarue (Lingreville 1813 - ? dopo dal 1851), editôr
'Retour des cendres', 15 Dicembar 1840
Litografie
1840 - 1841
Museu dal Risorziment, inv. 52743/R

La litografie e mostre, tal Hôtel des Invalides a Parîs, il corot sore la bare di Napoleon I, che al jere muart su la isule di Sante Elene ai 5 di Mai dal 1821.

Tal 1840, di fat, Luîs Filip I, re dai Francês dal 1830 al 1848, al organizà il funerâl di Napoleon, cognossût come 'Retour des cendres' ('tornade de cinise'). Dut câs, il cuarp di Napoleon I nol jere stât cremât. Il funerâl al de un gnûf slanç al partît bonapartist.

Tal 1861 Napoleon III, imperadôr dai Francês (1852 - 1870) e nevôt di Napoleon I, al veve sepulît il barbe innomenât tal sarcofac monumentâl fat di cuarzite rosse, che e vignive di Šokša (Lât Ladoga, Carelie, Imperi Rus).

Anonim
Pape Piu IX
Vueli su tele
1846 - 1848 (?)
Museu dal Risorziment, inv. 50751/R
1908, donazion Gabriele Fantoni (Vicence, 1833 - Vignesie, 1913)

Inte racuelte Fantoni il ritrat al jere assegnât al pitôr risorzimentâl Giacomo Casa (Conean, 1827 - Rome, 1887), autôr di une innomenade piture alegoriche di grandis dimensions conservade te Sale Garibaldi dal Museu dal Risorziment di Udin.
Il pape al à regnât dal 1846 al 1878, deventant un dai protagoniscj plui impuartants de ‘Rivoluzion taliane’: prin une vore amât e dopo malviodût di chei che a lotavin par che la Italie si sfrancjàs dal domini forest e si unificàs.

Joseph Anton Bauer (Munic, 1820 - Viene, 1904) dissegnadôr
Leopold Theodor Neumann (Viene, 1804 - 1866) litograf
Francesc Josef di Austrie
Oleografie
1853
Museu dal Risorziment inv. 52770/R

Deventât imperadôr che al veve dome 18 agns, dopo des rivoltis de ‘Primevere dai popui’ e tal mieç de Prime vuere di indipendence taliane, Francesc Josef al fo un dai prins sovrans a doprâ la sô imagjin tant che imprest di consens popolâr.
Za prin che si maridàs cun Elisabete di Baviere (Sissi) tal 1854, la monarchie vienese e mandà fûr, massime tra la piçule borghesie, oleografiis e altris oparis a presit contignût che a magnificavin il so biel aspiet di zovin.
Il so ream une vore lunc, caraterizât dal tentatîf di inmodernament tecnologjic (no simpri compagnât di riformis istituzionâls adatis) e di creazion di un model di coesion sorenazionâl, al finirà tal 1916, dopo vê inviât la Prime vuere mondiâl che e puartarà al colàs dal domini asburgjic su la Mitteleurope, durât par secui.

Ida Maria Regina von Culoz (Graz, 1818 - ?) (?)
Karl von Culoz
Vueli su tele
1838 (?)
Museu dal Risorziment, inv. 51899/R
1908, donazion Gabriele Fantoni (Vicence, 1833 - Vignesie, 1913)

Il baron e gjenerâl asburgjic Karl von Culoz (1785 - 1862) al à cjapât part a diviersis campagnis militârs in Italie e al è stât governadôr militâr di Vignesie dopo de colade de Republiche di Sant Marc (1849) comandade di Daniele Manin e difindude di tancj volontaris ancje furlans.
Inte racuelte Fantoni chest ritrat al jere datât dal 1838 e assegnât ae fie dal gjenerâl asburgjic.
Il restaur, però, al à fat vignî fûr une firme (“Bo[...]”) no ancjemò identificade, che e lasse cualchi dubi su la autografie de piture.

Giuseppe Malignani (Torean di Cividât, 1812 - Udin, 1878)
Olinto Vatri
Vueli su tele
1851
Museu dal Risorziment, inv. 50016/R

In graciis dal restaur resint a son vignudis fûr la firme dal autôr e la date di esecuzion dal ritrat.
Giuseppe Malignani, pitôr e fotograf une vore influent a Udin, si ispirà ai modei de ritratistiche venite dal Cinccent (Tiziano, Tintoretto) par rafigurâ cun grande elegance il patriot risorzimentâl furlan, zontant te rapresentazion une viodude dal Bacin di Sant Marc.
Vatri, di fat, al combatè a Vignesie tant che volontari par difindi la Republiche di Sant Marc adun cun tancj ativiscj dal Risorziment: tra chescj, une vore di lôr a vevin fat part dai ‘350 Itali’ che i asburgjics a vevin assediât a Osôf fin al mês di Otubar dal 1848.
A Udin, li dal editôr Jacob e Colmegna, tal 1866 Vatri al fo il redatôr dal gjornâl L'Industria e dal Bullettino, che a documentarin tal detai i scuintris militârs di chel an in Friûl e lis cuistions confinariis, centrâls tes tratativis che ai 12 di Avost a puartarin ae firme dal armistizi di Cormons.

Giuseppe Gautier (? - 1908)
Autoritrat
Vueli su taule
seconde metât dal secul XIX
Museu dal Risorziment, inv.: 50012/R

L'autoritrat al è stât donât al museu tal 1908, cuant che al è muart Gautier, un dai ‘350 Itali’ assediâts a Osôf tal 1848 des trupis asburgjichis.
Dopo de Tierce vuere di indipendence taliane, tal 1866 Udin e la plui part dal Friûl a forin inglobadis tal Ream di Italie. Gautier al jentrà tal Esercit Reâl talian.
Braurôs di fâ part des jerarchiis militârs di chel stât unitari talian tant bramât, il militâr si è rapresentât par tramandâ la sô memorie aes gjenerazions futuris.

Anonim
Cesare Michieli
Fotografie
1860 - 1889
Museu dal Risorziment inv. 51106/R

La fotografie e rafigure il garibaldin Cesare Michieli (Cjamplunc, 1838 - Çarvignan, 1889).
Il patriot talian al jere nassût tal Friûl orientâl, intune zone che e jere sot de Contee Principescje di Gurize e Gardiscje, che in chê volte e faseve part dal Ream di Ilirie (abolît tal 1849) dentri dal Imperi di Austrie.
Michieli al à partecipât ae imprese dai Mil e ae Tierce vuere di indipendence.
Lis colezions dal museu a conservin diviers ogjets apartignûts al patriot furlan, e ancje un so ritrat post mortem a vueli su tele realizât tal 1907 di Antonio Milanopulo (Udin, 1842 - 1920).

Anonim
La famee di Garibaldi
Oleografie
1863 (?)
Museu dal Risorziment, inv. 52769/R

Cheste cromolitografie fissade su tele di cjanaipe, depositade ancje jê di Doretti li dal museu tal 1909, e rapresente un pendant e cuintripês mediatic dal ritrat uficiâl de famee reâl taliane.
Inte dimore di Caprera, sot de ombrene di un pergolât, Giuseppe Garibaldi (1807 - 1882) al pose cui siei trê fîs – rivâts ae etât maiôr – vûts cu la prime femine Anite (1821 - 1949).
Tal mieç, sentade cuntun libri viert tes mans, une figure feminîl zovine: al è probabil che e sedi sô fie Taresie (1844 - 1903). Daûr di lôr, Domeni Menotti (1840 - 1903), il prin fi di mari dal Eroi dai Doi Monts. Plui lontan, cun vistît e cane, Stiefin Canzio (1837 - 1909), om di Taresie. Dongje, cu la monture rosse, Ricciotti Garibaldi (1847 - 1924).
Il condotîr si è maridât dôs voltis e al à vût altris fîs di feminis diferentis.

La famee di re Vitori Emanuêl II di Italie
Oleografie
1869 (?)
Museu dal Risorziment, inv. 50154/R

Ai 2 di Dicembar dal 1909, par meti sù lis salis dal Museu dal Risorziment, il tipograf Giovanni Battista Doretti, di Udin, al concedè la opare in dipuesit ae Societât furlane dai tornâts e veterans des bataiis de patrie.
La oleografie e rapresente la Famee Reâl dal Stât Unitari talian a pene nassût: Vitori Emanuêl I (1820 - 1878), proclamât re di Italie ai 17 di Març dal 1861, al pose cui siei fîs legjitims vîfs in chê volte, un zinar e un altri parint. A son rafigurâts i princips Umbert (1844 - 1900, futûr re di Italie dal 1878 al so assassini a Monza) e Amadeu (1845 - 1900, futûr re di Spagne e duche di Aoste) e lis principessis Marie Pie (1847 - 1911, regjine dal Portugal dal 1862 al 1889) e Marie Clotilde (1843 - 1911). Si viôt ancje l’om di cheste ultime, il gjenerâl francês Napoleon Josef Carli Bonaparte (Triest, 1822 - Rome, 1891), futûr princip di Montfort. Il personaç masculin dongje dal sovran nol è stât ancjemò identificât.
No je presinte la prime femine, Marie Adelaide di Asburc-Lorene, regjine consuarte di Sardegne, muarte tal 1855; ni il princip Odon Eugjeni Marie, muart tal 1866 a 20 agns; ni la seconde femine dal sovran, maridade cuntun matrimoni morganic ai 18 di Otubar dal 1869, li che a nasserin un frut e une frute, ancje lôr lassâts fûr di chest ritrat uficiâl.