Par celebrâ i 160 agns de jentrade di Udin e de plui part dal Friûl tal Ream di Italie (1866), il Museu dal Risorziment al presente une selezion di bens des sôs colezions che cumò, dopo tancj decenis, a son di gnûf a disposizion midiant di restaurs impuartants fats in gracie dal impegn dai Museus Civics di Udin, dai contribûts de Regjon Friûl-Vignesie Julie e dal cofinanziament de Fondazione Friuli (Bant Restaur 2025).
La mostre nus invide a bandonâ lis distinzions tradizionâls tra "bogns” e “triscj" o tra "nô” e “chei altris", dant vôs ai sacrificis, aes dinamichis di famee e aes sperancis che a àn influençât lis vitis di personaçs diviers che a àn formât la societât furlane, taliane e europeane fin a vuê: conservadôrs, democratics, ‘austriacants’, federaliscj, centraliscj, Catolics, minorancis religjosis, massons, anticlericâi, monarchics e republicans.
Dilunc dal percors, i ritrats di cierts zovins furlans emigrâts e muarts in non de Libertât e de Unitât di Italie a invidin a rifleti su cemût che, tal Risorziment, i ideâi a àn sburtât gjenerazions interiis a
emigrâ e a sacrificâsi. Il ritrat dal vuardian venezian di Silvio Pellico al riclame il teme de repression politiche e la sô soste a Udin te trate bande la detenzion dure tal Spielberg, contade tal so Le mie
prigioni. La colezion di cartulinis austroongjaresis de Prime vuere mondiâl, invezit, e rapresente une testemoneance rare sul ûs de propagande tal orientament de opinion publiche sot dal domini
dai Asburcs.
I ritrats dai sovrans di Viene, che a àn dominât sul Friûl cul pugn di fier, a dialoghin cun chei di cualchi patriot dal Risorziment furlan e di cualchi protagonist de ‘Rivoluzion taliane’ come re Vitori
Emanuêl II, Garibaldi e Piu IX, l’ultin “Pape Re”. No mancjin elaboradis alegoriis politichis. Dongje dai ritrats su tele a son esponûts i dissens, lis litografiis e diviersis oleografiis une vore raris: si trate
di litografiis coloradis, aplicadis su tele, rifinidis a vueli o acuarel e insuazadis. La piçule borghesie, cuant che no podeve permetisi ritrats e alegoriis a vueli su tele, ju doprave par decorâ lis sôs salis
testemoneant il so patriotisim e i siei ideâi politics.
Ciertis incisions a ricuardin episodis belics famôs sucedûts in Friûl, come la Bataie dal Tiliment dal 1797. Cualchi fotografie, po, e conte la evoluzion di Udin sot dal domini austriac: e risalte la
militarizazion de aree dal Cuel dal Cjistiel, trasformât tal ‘Fuart di Sant Blâs’ tra il 1848 e i 26 di Lui dal 1866, cuant che i Austriacs si ritirarin dal cjâf lûc furlan.
Stemis preseadis nus fasin scuvierzi cemût che, tal Lunc Votcent, lis potencis che si son dadis la volte in Friûl a vedin curât tal detai la lôr imagjin publiche. A Udin si son fermâts ancje membris de
alte societât europeane, direts ae cort di Viene o tes citâts di chei Stâts talians controlâts dai Asburcs prime de Unitât. Ae élite si contrapon la ’Societât furlane dai tornâts e veterans des bataiis
de patrie’, istituzion che e meteve dongje ativiscj di diviersis fassis sociâls e apartignincis politichis pe trasmission de memorie dal Risorziment, ancje midiant des donazions e dai dipuesits storics
che a àn insiorât lis racueltis dal Museu.
Al siere il percors un video che al conte, cu lis testemoneancis dai restauradôrs, lis scuviertis sientifichis plui impuartantis vignudis fûr cui intervents conservatîfs su chescj bens: dai restaurs a
nassin gnovis ipotesis di atribuzion e interpretazion, di lâur insot un doman cun gnûfs studis. Graciis ae colaborazion tra Ents, istituzions e professioniscj, duncje, cumò si pues tornâ a scuvierzi un
patrimoni di grant valôr storic e sociâl.