Il progjet fotografic di Ulderica Da Pozzo al nas di une scomesse civîl e umane inviade tal 2021, cuant che il Garant dai dirits des personis privadis de libertât personâl dal Comun di Udin si è dât l’obietîf ambiziôs di cambiâ in maniere radicâl l'aspiet de preson di vie Spalato. La idee di fonde e jere che il recupar e la ristruturazion di diviers spazis bandonâts aromai di decenis a podessin ufrî un gnûf dissen ae cuotidianitât dai presonîrs, trasformant l’ambient fisic par dâ sostance ai principis di dignitât e al detât dal articul 27 de Costituzion, che al viôt te pene un percors finalizât al reinseriment sociâl. Si tratave di proponi un model di riflession che nol fos astrat, ma une vore concret, bon di superâ il dubi cu la tangjibilitât dal cambiament.

Vuê si puedin viodi i prins travuarts di chest percors: i lavôrs dal prin lot, cu la inaugurazion de gnove sede de semilibertât tal Zenâr dal 2024 e de ex sezion feminîl tal Lui dal 2025, a son finîts. A chescj spazis, che di Zenâr dal 2026 a ospitin ativitâts rinovadis, si à di zontâ il completament dal secont lot, destinât a ospitâ un teatri e salis pai colocuis cu lis fameis, lûcs fondamentâi par mantignî i leams afetîfs. Dut câs, testemoneâ la transizion di chescj ambients in disûs, che a mantegnin i segns di tantis vitis passadis, e trasmeti il valôr de lôr ricualificazion, nol è un compit banâl. Il risi al jere chel di semplificâ la complessitât dal vivût, confrontant in maniere didascaliche spazis limitâts cun spazis ospitâi.

Par evitâ cheste semplificazion e par segnâ la stratificazion di esistencis leadis al passât, la sielte e je colade su Ulderica Da Pozzo, une fotografe di grande sensibilitât che za di agns incà e indaghe lis “stanziis bandonadis” e la memorie che a conservin. Jentrade pe prime volte tes celis de ex sezion feminîl tal 2021, la artiste si è mote “in ponte di pît”, cuntun rispiet che al va di là de semplice documentazion fotografiche. E à cjapât la anime di chei spazis plens di une memorie stratificade, par invidâ l’osservadôr a rifleti su la cundizion umane e sul impat profont che i ambients a àn sul individui.

Midiant dal so obietîf, Ulderica Da Pozzo e dialoghe cui coridôrs e cu lis celis, interpretant i segns dal timp e trasformant lûcs di costrizion in spazis di pure riflession. Lis fotografiis a fissin cuntun ûs savint de lûs detais plens di fuarce emotive: la cjarte dal mûr sbregade, frasis incidudis, dissens e i diviers strâts di piture che, come sediments gjeologjics, a contin il passâ dai dîs. In chestis imagjins, lis presincis si trasformin in assencis cidinis, evocant lis storiis di cui che al è passât in chei lûcs. E ven fûr prepotente la idee di un timp che fûr al trasforme ogni robe, ma che par cui che al è presonîr al somee restâ imobil, fer tra mûrs frêts là che dome lis sbregaduris a pandin, ae fin, la fragjilitât de anime.

Passâts cinc agns, tal 2026, la fotografe e je tornade tai stes lûcs, cjatantju une vore mudâts, cuasi strassomeâts e no plui leâts a chês personis che e veve imparât a cognossi midiant dai segns dal passât. Denant di chest ambient gnûf, che cumò al ufrìs oportunitâts di cressite e sensazions gnovis, la artiste si è cjatade cuasi stranide, testemoneant un mût di vivi dal dut diviers. La mostre e met duncje a confront doi timps e dôs visions: se il lavôr sul passât al è fondamentâl par no pierdi lis olmis di cui che al à vivût in chei spazis, la narazion de trasformazion corinte e evidenzie cemût che la ricualificazion e puedi cambiâ la prospetive di cui che al reste. Là che tal passât il timp al jere lent e cuasi fer, vuê i voi a cjatin cjartis gjeografichis e lavôrs sui sintiments, simbui di une gnove partence e di une rinovade centralitât des relazions umanis.