Guido Guidi (Cesene, 1941) al à studiât tai agns Sessante tal Istitût Universitari di Architeture e tal Cors Superiôr di Dissen Industriâl di Vignesie, dulà che al è stât arlêf, tra chei altris, di Italo Zannier. Atîf te ricercje fotografiche dal 1969, al à esponût in numerosis mostris personâls e coletivis in Italie e tal forest e al è cognossût come un dai plui grancj protagoniscj de fotografie internazionâl.

Guidi, che al è stât par tant timp docent te Academie di Bielis Arts di Ravene e te Facoltât di Design e Arts de Universitât Iuav di Vignesie, al è leât al Friûl-Vignesie Julie di une lungje frecuentazion. Dal 1985, su invît dal CRAF di Spilimberc e di altris istituzions de regjon, al à diret numerôs laboratoris didatics e realizât une serie di progjets fotografics su lis tematichis dal paisaç contemporani. Premiât cul Premio FVG Fotografia tal 1988, al è stât dôs voltis vincidôr (tal 2014 e tal 2020) dal Premio Hemingway di Lignan. Il so prin volum retrospetîf, Varianti, al è stât publicât tal 1995 de cjase editore Arti Grafiche Friulane.

A dîs agns de publicazion di Guardando a Est, un libri curât di Walter Liva che al torne a dâ dongje lis cutuardis tapis di cheste esplorazion trentenâl dal teritori, i curadôrs a àn colaborât cul fotograf, cul Archivi Guidi di Cesene e cul Archivi dal CRAF par proponi une gnove leture di seriis e secuencis fotografichis in part ancjemò ineditis.

«Jo o soi il prin spetatôr di chel che o fâs», al dîs Guidi tornant cui voi de memorie tai lûcs fotografâts e presentant il percors che o viodês in cheste mostre. Dopo de prime serie su Triest dal 1985 a rivin i lavôrs realizâts tai laboratoris fats cui zovins a Spilimberc tal 1991, 1994, 1995 e tal 1997 (in dialic cu la opare di Pier Paolo Pasolini); a Lestans tal 1992 e 1998; a Vençon tal 1996, a vincj agns dal taramot; a Pielunc e Pinçan tal 1999. Su invît de Facoltât di Architeture de Universitât di Triest, Guidi al à cirût, come che al fâs di solit, ponts di viste “fûr lûc” a nivel fisic e mentâl tra i cuartîrs ATER a Udin tal 1999 e a Triest tal 2002. Tal 2004 al à frontât il teme de trasformazion dal confin a Gurize, par po dedicâsi a San Vît dal Tiliment e Lignan tal 2014.

Chest percors di paisaçs e detais al testemonee il rinovament continui dal lengaç visîf dal fotograf di Cesene, che tal timp al à dât vite a une iconografie inedite e complesse dal nestri paisaç contemporani. In chestis imagjins, i lûcs si pandin come palinsescj plens di segns e di storiis no ditis, di progjets ambiziôs e di ats cuotidians, di culturis “altis” e di pratichis “bassis”. Al è impuartant ricognossi il valôr de «cualsiseietât», al dîs Guidi; passâ i «interstizis» che si vierzin tra lis robis, lavorâ tai «margjins» incierts che a dividin e a metin adun ce che o cognossìn o che o crodìn di cognossi. Ae fin, in chestis fotografiis il paisaç al devente un sogjet pulsant e enigmatic, une presince che in maniere ideâl nus torne la viodude e che cussì fasint nus interoghe su la nestre capacitât di cure e di comprension.